بعد مارحنا وصلينا ؛ وأكلنا الفته وحلينا ؛ هيا نقرأ " أكلة كوارع " ومافعله صديقى الملاوع ••
أكلة كوارع
قالى ياناس بكره راجع
وف إيده أكلة كوارع
استنيته على البلكونة
وقت الغدا باصوصو وجائع
لقيته جاى من بعيد
وشايل كيس أصفر وفاقع
شاورت ليه أوام تعال
راح بسرعة للشقة طالع
دخل وساب اللى ف إيديه
جنب حلويات وساقع
كنت جايبهم عشان مانهضم
الأكل اللى يفرقع مدافع
رحت فتحت الكيس وألاقى
فلافل وبطاطس صوابع
قمت مصرخ بغيظ ف صاحبى
وصوتى جاب لأخرتها شارع
لقيته قرب ياخويا منى
وعلى وشى ميل وطابع
بوسه يمكن أسكت وأهدا
بس إزاى وقلبى والع
وفجأة الناس اتلموا عندى
ولقيت بيتى كأنه جامع
وكان معاهم جارنا اللئيم
اللى كان متسنط وسامع
فشرحت ليهم الحكاية
ومافعله هذا الملاوع
فتحوا الكيس شافوا الفلافل
نزلوا عليها بالتدافع
كأنهم دبان بيشغى
أضربهم أبدا مانافع
وبعد ثوانى مالقتش حاجة
غير كيس فاضى وناصع
قام قربلى شاب منهم
تخين قلبوظ وطوله فارع
بيمشى ويتكلم بصعوبة
أما فى الزلط واللهط بارع
قال الفلافل ميه ميه
بس الزيت شويه لاذع
وشاب تانى جه يكلمنى
شكله كان أهبل ولاسع
قالى ياعمى فين الغموس
فغظنى أسلوبه اللى مايع
رحت حادفه بزهريه جانبى
جت ف وش الواد مطاوع
صرخ من شدة آلامه
راح بعديها ع الأرض واقع
جرينا وقومناه بالعافية
قام معانا وخده دامع
بعديها راحوا غسلوا إيديهم
وجم قعدوا زى الضفادع
اللى يعفر واللى يغنى
واللى يهزر أكمنه شابع
واللى يمزمز مابين سنانه
ويقولى الله الأكل رائع
جيت قولتلهم شرفتونا
يلاه باتوا مكانا واسع
وانت ياجدو غير هدومك
بالله عليك لانت قالع
قالوا ليه شكرا ياايمن
حانسيبك وحنطلع للسابع
أصل احنا سامعين زعيق
تعال لو معندكش مانع
قولتلهم ألفين سلامة
تعالوا بكرة أكلة كوارع
~~~~~~~~~~~~
الأديب والشاعر
والمحرر الصحفى
ايمن عزالدين سكورى
من مدونتى
صداح فى بلاد غريبة
ليست هناك تعليقات:
إرسال تعليق