الشاعر / رضا البوشي
قصوصة الأحلام
وطلعلي مارد من الفانوس
بيقولي امرك مطاع
جلا جلا هفتح خزايني كلها
وهمرمغك في النغنغة
وهعيشك جوة القصور
لا صداع ولا بهدلة
انا قولتله والدمعه لسه نازله وقتها
نفسي اخبي الألم بين الشقوق
والحلم يتولد تاني مع طلعه شروق
والدنيا تلبس تاني ضحكتها
والسمك يفوت الشط يقب مرة لفوق
وعايز اهرب من السجن الكبير
واركب ريش على جناحي واطير
واجيب لنفسي قلب تاني أخضر
وافرش الأحلام فوق السرير
وهاتلي كام فرشه على حبه الوان
ألون الايام زي شم النسيم
وأحبس الاحزان في زنزانه
واخنق بأيدي الجرح
وألهم يبقى يتيم
قالي ياعم
انا ليا في الفرفشة والنعنشة
وما ليش في عوله الهم
ولوني احمر زي لون الدم
انا قلتله جلا جلا
ابعد عني بعيد ياواد
لا احرقك وتبقى ضل رماد
ليست هناك تعليقات:
إرسال تعليق