؛؛؛؛؛؛؛؛؛؛؛؛؛؛؛؛؛
يا يمامه بكتب لك
بكتب لك وبقول لك للمره الألف
على قد مابتمنى همسك وقربك
وافرش وانام جوا نبضك و قلبك
على قد مابتمنى هجرك وبعدك
ومن عليل وجنون عشقك
نفسي يا يمامه اداوى واخف
للمره الألف. بكتب لك
حبك سحر جاي من كهف مسكون
حبك مس جان قاسي وملعون
ساحرني واخدني لطريق الجنون
بعترف لك واقول لك
حبك ف حياتي هو نقطة الضعف
ومن عليل وجنون عشقك
نفسي يا يمامه اداوى واخف
للمره الألف بكتب لك
يا ام همس بيغتال الحس
واخد من الكراوان الشجى ورث
ليه زارعه ف طريقي فدادين الاهات
اتكلمي واهدمي بيوت السكات
قولي بتتألمي قولي احساسك مات
يا يمامه اتكلمي وابعديني وابعدي
ارجوكي ابعدي واعندي واعندي
خلي بحور عشقي ليكي تجف
ومن عليل وجنون عشقك اخف
بعترف لك واقول لك
عشقك ف حياتي هو نقطة الضعف
للمره الألف بكتب لك
قلبي ياغريب
من يومك وانت صياد
ليه شبكك بيخيب
واللي شبكك هو اللي اصطاد
ليه يا يمامه ليه العناد
ساعة العصاري جايه جايه
تلبس على عين الشمس الحداد
وتهدى ناري ولياليه
لما اشوف ب قلبي وعنيه
غرورقلبك ف شوق
وحيره وحالة ضعف
للمره الألف بكتب لك
كلمات على عبدالرحيم محمد
ليست هناك تعليقات:
إرسال تعليق