بيروت يا عطر الورد
فاحت زهورك ع شبابيك الأمل ناطرة نظرة عيونك
بيروت يا عمر الصبا ال ما بشيخ مهما كبرت شجونك
فيكِ
روح المودّة ونفحة محبّة ولو خيروني اخترتك رفيقة درب
تَ كفّي هل عمر الجريح
بيروت يا مرتع الصبا
كبرت فيكِ
وترعرعت غصوني
عَ أرضِك مشيت
عَ همسِك سهرت وما غمّضت عيوني
فيكِ الحلى المخطوف
فيكِ العمر المنهوب
فيكِ الأمل المسلوب
فيكِ وطن الخوف بعيونو
وإنتِ صبيّة فايحة عطورك
عَ كلّ البيوت
بيروت يا كلمة وجع
بيروت يا غنيّة وشعر منظوم موزون حامل كلّ الحروف المقفّى والمعنى
والزجل ال ما بتخلص حروفو إلّا ع بوابك ع شبابيكك ع ارضك لِ مشينا كلنا عليها
وما فرّقتي بيناتنا
قلبك الكبير سايع ال كتير
وبعدك عم تتحملّي؟!
اصرخي وقولي لوين رايحين
عّلي الصوت
وعّيهم لَ هل نايمين
احكي عن وجعك
حكي عن ألمك
انتفضي كيف شوّهو معالمك، حضارتك، وصورتك
اصرخي وحاج تكتمي وجعك
ما حدا حاسس فيكي
متل الأمّ ال كبرو ولادها وناطرة منهم وفاء كبير
طلعوا هل ولاد بلا ضمير تركوها وخذلوها
ومش عارفين انها بعدا عم تدعيلن بالهداية تَ يرجعلن الضمير ويغيّروا هل المسير …
بيروت يا بيروت انا بحبك كتير !
بقلمي ريما خالد حلواني
ليست هناك تعليقات:
إرسال تعليق