هالغنّية..كانت أمي تقولالبيّ بقلم أبوأحمدإبراهيم معيكي

هالغنّية..كانت أمي تقولالبيّ..

يوم ال بيّ راح عالعسكر..

قلّا رايح رد بلادي..

أخدو بلادي ولك ياسكّر..

أمي ضبّتلو الزوّادة..

زيت وزعتر متل العادة..

ومطرة وكم رغيف مقمّر..

قلّا رايح رد بلادي..

أخدو بلادي ولك يا سكّر..

كان الجفت ال تركو جدّي..

جهلان بيلمع والعدّة..

وكم خرطوشة بهاكي العلبة..

وخنجر يلمع متل الحربة..

وبيّ عم يضم الجفت ويبوسو..

وعم يضمني ويبوّسني..

وينك رايح يا بيّ؟

رايح بدّي رد بلادي..

أخدو بلادي ولك يا إبني..

بيّ راح..

ولابس وقتا متل الفارس..

بارودة وقشاط وعمرة..

متل العسكر..

بوّسني..وبوّس إخواتي..

وأمي بوّسا..

قلتلّو عيب يابيّ..

بيّ اتضحك..

ولهلّق بتذكّر..

عند الساحة وقفت طفلة..

متل الغفلة..

شلحت حالا ع بيّ..

وبكيت هالطفلة..

قالتلو ..

لوين خدني معك يافارس..

عاساحات الليل العابس..

بحملّك قنديل يضوّي..

لحصانك سهلو ووديانو..

بيّ..لو طفلةحملت قنديلو..

ما مات حصانو..

بيّ راح ورد بلادي..

سهل وجرد وتل ووادي..

حمّلني ع خصري خنجر..

نطرني ت كبرت وختير..

رجعوا الأعدا أخدوا بلادي..

بيّ اتحيّر..

قلّي يابني وين الخنجر..

وين الطفل ال بدّو يثأر..

وقبل ما يهدا سؤالو..

طلعت شمس بوجه العسكر..

(أبوأحمدإبراهيم معيكي)