لو كنت عايز يعني يوم تصبح بطل
كلمة هقولها لحضرتك وبأعلى صوت
جايز تفكّر إني عقلي فيه خلَل
لكن عشان تصبح بطل لازم تموت
لازم تموت علشان بجد يكرّموك
ويعملوا تمثال كبير وسط الميدان
وأكيد كمان جوه التاريخ راح يذكُروك
وف كل شارع إسمك وصورتك كمان
طول ما إنت لسه حيّ مين راح يعرفك
مهما تعيش مظلوم ما حد هينصفك
صوت الندم جواك تملّي مكتّفك
وتملّي عايش جوه حالة من السكوت
لو كنت عايز يعني يوم تصبح بطل
كلمة هقولها لحضرتك وبأعلى صوت
لو عِشت مهما عِشت من عمرك سنين
مش راح حتلقى حد يوم هيقدّرك
وبعد لمّا تموت يدوب بس بيومين
هتلاقي كل الناس بقت تتذكّرك
اللي يقول على روحه 100 رحمة وسلام
واللي يقول واللهِ يستاهل مقام
وهتلقى بردوا البعض ييجي بعد موتك
ويقول ده كان طيب وكان راجل تمام
من الأكيد أحسن لنا طبعاً نفارق
أصل الحياة ماكنتش واقفة في صفنا
ووجودنا يعني شئ بجد ماعدش فارق
والموت أكيد هيكون بقى أفضل لنا
إحنا كده مابنتعرفش من قبل الممات
غير لمّا نرحل ولّا نصبح ذكريات
تلقى التاريخ دايماً يخلّد ذكرياتنا
وعلينا دايماً يتحكي أحلى حكايات
بقلمي عبدالحميد وهبه
15/4/2024
ليست هناك تعليقات:
إرسال تعليق