قالت ستي سبعه شيلهم من الأحباب
اوعي يا بني تاني تفتح ليهم الباب
الأولاني إللي لمشاعرك وقيمتك
مبيعملشي لا خاطر ولا أي حساب
والتاني إللي مبيردش في غيبتك
ومع اللي عابوا بتلاقيه عليك يوم عاب
والتالت إللي شاف ف عينك ضحكتك
حاسدك ساعتها وبيجيله إكتئاب
والرابع إللي سابك تمشي سكتك
وقت الوجع ووراه راح ورد الباب
والخامس إللي فيك بيشمت ويفرح
ودا حاله حتي أكتر من الأغراب
والسادس إللي بيبيع العشره ويفرح
ف ثانيا ولحظه علي أتفه الأسباب
والسابع علي الغلطه واقفلك حداد
وعليها بيجي يحاسبك ميت حساب
دولا قلوبهم دايما سواد في سواد
لا لوم بينفع أو كلام أو حتي عتاب
بيضلموا حياتك وكل عيشتك
زي الضلمه إللي بتيجي من السحاب
دولا اللي دايما عايشين يجيبوا ف سيرتك
ساعتها لازم تقرر الإنسحاب
الشاعر الغنائي /عرفات فرج الله بلبل
ليست هناك تعليقات:
إرسال تعليق