خرّج وطنك من جواك
زي ما وطنك باع وإتخلّى
يبقى عشان ماوقفشي معاك
عيش وإختار مصلحتك أولى
بينُه وبينك حُط سدود
وإبني جدار وإرسم في حدود
ومادام طرَدك من جواه
كان ولابد يعيش مطرود
ومادام هو عليك مش باقي
إياك تحلم يوم بتلاقي
عِشنا العمر تيران في سواقي
من غير قوة أكيد ولا حولَا
خرّج وطنك من جواك
زي ما وطنك باع وإتخلّى
إياك مرة في يوم تتنازل
ولّا تحاول يصحى ضميرك
بيعُه وحاول يوم تتجاهل
زي ما باعك وإشترى غيرك
عدّى سنين كان لاغي وجودك
ولا يوم صان حقك وعهودك
إنت كمان غيّر أفكارك
خلّي ضلام الجهل يسودك
إوعى في يوم تظهر مشتاق
ولّا تحن في يوم لترابُه
زي ما إختار تعيش في فراق
وقفل حتى في وشك بابُه
يبقى عليه مش لازم تبقى
اللي حياتنا معاه مش فارقة
عارف يعني اللي بقولهولك
حالة فريدة ومالهاش سابقة
بقلمي عبدالحميد وهبه
ليست هناك تعليقات:
إرسال تعليق