شعر/سعيد حمدي محمد
★★★★★
طول ما فيكي شباب متعافي
اوعاكي يا بلادي يوم تخافي
من اى طوفان يجيلك
دا انا فارس نيلك
قبل ما تنادي اجيلك
وان غدر الموج
يشقه سيف مجدافي
★★★★★
انا اصلي مراكبي
عشقك فى قلبي
كعشق القلع للصاري
متعلق دايما فى شغوله
وهواكي ينام فى طوله
زى الموال يصاحب ارغوله
فى ليل الصفا ويسافر
★★★★★
وبقالى سنين بعافر
غاليوني مايوم يتاخر
طول ما بغربل نهرك
لاجل ما احوش مهرك
واشبك هلب غرامى
فى شط عنيكي واتمدد
واشدد. حبال شبكي الذرد
حالف عمره مايتفرد
خايف تهرب منه الشهامه
وغزل اﻷصاله يتقرض
★★★★★
انا ماسك الدفه هنا يابا
ومالى قلوعي بنسيم الطيابه
ريس فى سفينة نوح
وهالملم معايا الغلابه
★★★★★
دايما عاشقين المهابره فى ربوعك
والعرق. بيولد جبابره فى طوعك
حالفين ما ينحني ضهرك لطوفان
ولا تنزل ع الخد يوم دموعك
★★★★★
شعر "سعيد حمدى محمد
10/1/2023
ليست هناك تعليقات:
إرسال تعليق