باركا ***
باركا ...
من التعصار والفراكة
راه لقلب طاب
فعايل الشمايت والذياب
مجموعة الفاشلين ولعراكة
باركا
من جوع كلبك يتبعك
نخاف عليك يسعر ويعضك
قنع...
وبالتساوي وزع ذيك البركة
يرجعوا لحراكة
ؤ يحس بالنخوة مول لحصير و لبراكة
باركا
من الزكير والتمييز والعنصرية
كاملين خوت نهز بك تهز بي
نفقسوا ب لمحبة لعدو ...
ؤ لَ صفينا يزيد يهبل ويتراكا
نركبو سفينة صفي تشرب
لا باك صاحبي لا غش لا نهب
نتسواو في لميزان ...
تحيد الانانية وتطور لحركة
على فرحة بعضياتنا كلنا نكافحوا
نخدموا الغير ففرحتو رباحنا ورباحو
ترمم لحمية ونزيدوا ليه نباركوا
بل نبنيو الانسان ؤ ندعموا لفاشل
نديرو التقدير ولوقر سلاح ضد كل سافل
نعودوا لو التربية ومن الشناقة باركا
هم لهلاكة
ريبو الخير كنزوا ما شبعوا
شنق شنق وزيد ؤ ما حشموا ما قنعوا
عصابة الطنازة...
اعداء النماء والنور ولحداكَة
باركا...
من سخسخ وجبد لودنين
خير سمانا وبرنا وبحرنا كافينا كاملين
لغلة كثيرة لكن سرطها طماع تنين
خاصو ل يزبرو
يفركو ويعصرو
على الريال باع الصالح العام...
ولى خوان ما يصلاح ل رفاكا
باركا
من طنز علي نطنز عليك
لبخ ولفش ولكذوب ؤ ذيك ؤذيك
مزدوج عايش مغشوش في الفبركة
بل تواضع ولخوك سكَي
لا تنافق طهر روحك ونقي
وخا تملك ب لحرام الدنيا...
تبقى قزم صغير ؤ ف دواخلك شاعلة لحراقة
قضي حاجة خوك ؤ لا تفرق
لا تكون برهوش وعى وعلى لغش طرق
تزيان النفوس...
يعم لخير والبركة
باركا
المغرب****** الشاعر والزجال:أحمد الكندودي
ليست هناك تعليقات:
إرسال تعليق