إزاى الشمس مطلعتشى وإزاى هتغيب ؟!
وإزاى الضحكه فى يوم غابت عن أغلى حبيب ؟!
وإزاى يوم بيينا التكشيره هتعيش وتدوم ؟!
وإزاى القلب فى يوم يفرح وفى وسط هموم ؟!
إزاى الحظ اللى معاند راح يظبط تانى ؟!
وإزاى الطيبه فى وسطينا واقفه وبتعانى ؟!
وإزاى الظالم ميفوقش فى وسط الصدمات ؟!
وإزاى الفكر اللى يسوقه ناسى عمره الفانى ؟!
إزاى نستنى فى يوم بكره بالفرح يجينا ؟!
ونقول الضحكه خلاص بكره جايه تراضينا !!
ونقول الورد فى بستانا راح ينشر نوره !!
ونلاقى الشوك وحده جانا ويجرح فينا !!
إزاى الخطوه بنمشيها وبنرجع تانى ؟!
ومابين الأهل ومشاكلهم الناس بتعانى !!
والكل بيحكى فى أفكاره وإزاى مرفوضه !!
رغم إن مرايه أفكاره بتقول دا أنانى !!
إزاى اللى يفكر يضحك يقولوله كداب ؟!
والفرح أن فكر يحضرنا يتنش غياب !!
والقلب الطيب قال يفرح شاف ياما عتاب !!
ليه قطر العمر وتذكرته مقطوعه ذهاب !!
ازاى الرنه متوصلشى وإزاى مترنش ؟!
إزاى تخسرنا وبسهوله بتقول مايهمش ؟!
وإزى الجرح اللى صايبنا بيزيد ويزيد ؟!
وبرغم علاج وعلاج ياما حالف ميلمش !!
تحياتى /
مدحت لطفى عبدالعال
ليست هناك تعليقات:
إرسال تعليق