عبد خلف حمَّادة
**********************
گلبي احراگ الجِدر ،و جنزار فوگ نحاس
و وجاع جوا الحشا،و تگول ضرب مُواس
صفِّيْت گوس النَّدِف،والفكر بيه وسواس
وخايف أگول إش جرى،وتضحك علي الناس
ومن زود هَم الصدر،الشيب عبَّا الراس
ويا حيف هذا الوكت،سوا العفن نِبراس
المال راس الحچي،عند الخلگ مقياس
وأكبر عيوب الرجل،مهما عَلا الإفلاس
ولو كان صاحب ذكا،بالقندره ينداس
و يصير طيبو ردى،شخطه على الگرطاس
منبوذ عنز الجرب،دوم بدبس تنحاس
وأبو الفلوس الطجع،عند الخلگ جسَّاس
ويصير صدر الربع،و ادلال والمحماس
ومنين جاب الجرش،محد يعرف الساس
بواگ لُوْ مرتشي،گواد أو نخَّاس
العالم تنافج إلو،و تگول عنو باس
الله إش ضاعت قَيَم،و گديش مات إحساس
و الديچ طار و صعد،گالم ابن فرناس
و إيد الچلب للأسف،عند البعض تنباس
والصگر صادو العفن،يا حيف يا جرناس
يشويه شوي الصعو،ويعزم عليه الناس
**********************
مع تحيات الشاعر والكاتب عبد خلف حمَّادة
ليست هناك تعليقات:
إرسال تعليق