للخلف دُر
ارجع بقى كِفاياك يا قلبي
عذبتني للخلف دُرّ
ياما قلتلك ما تسيبشي حضني
ورطتني وسقتني مر
كان إيه لزومه تتعبني يعني؟!
حزن وضنا عليك تجر
دلوقتي جاي بتقوللي خدني
قلبك أنا فيّا أنت حر
مش قلتلك ده العشق خَيَّة
إياك تسيبه ف عنيك يغر
كت إربِتَك مليانة ميّه
دلوقتي ماشي وعليك تخُر
بحر الهوى أمواجه عالية
لو تنزله ما هتلقى بر
غدار أوي ورياحه عاتية
ونوِّته مالهاش مفر
بركان ألم أوجاعه حامية
وثورته ف القلب جمر
جرِّيت دموعي من الندم
ومن الآهات
سهرت رمشي
بس أوعدك أنسى الألم
كل اللي فات
كما لو ماكانشي
على شرط تمشي
ف طوعي يا بني
ومن سكات
ماتسيبشي عِشي
ولا تعصى ليا أى أمر
للخلف در
بقلمي/ خالد جمال ٢٢/٦/٢٠٢٥
ليست هناك تعليقات:
إرسال تعليق