حب بدري وحب وَخري
قلبي الرزين الهادي الرصين
فاض بيا منه وجِبت أخري
بيحِن قال دلوقتي مال
طب ليه يا عم ما لسه بدري
مرت سنين عايش حزين
دلوقتي جاي يحب وخري
كان طاوي الحنين وحالف يمين
ما يكون ف يوم الحب قدري
إزاي ده رق بسهولة دق
ده باينّه شت أو عقله طق
مجنون يا ناس وجنانه رسمي
طب قوللي ليه؟!
بيزيد ف إيه؟!
اشمعنى ده اللي اشتاقتله
وجريت عليه
خلاك مشيت وراه مغمي
جاوبني يالا يا قلبي رد
جوايا سيل م الأسئلة محتاجة رد
ماتقولشي قدري وغصب عني
قاللي الغرام طبعه كده
ليه العجب من غير سبب
ومالوهشي وقت
كل اللي فات من عمرنا
من غير هوى
مكتوب لنا وماكانش قصد
لوم القدر وبلاش تلومني
قلت صح برئ يا قلبي
مالكشي ذنب
ليه بلومه اكمنه حب
مين بإيده يحب بدري
أو بخاطره يحب وخري
بقلمي/ خالد جمال ٢/٦/٢٠٢٥
ليست هناك تعليقات:
إرسال تعليق