مشدود
مشدود لجمال عدى حدود
مشدود للقد وللعود
مشدود للخد عليه ورود
لرموشها ولعنيها السود
للشعر الباهي المفرود
مشدود للصوت نغمة عود
وهعيش وهموت بيه موعود
ولحد أما ياكلني الدود
هفضل لحبيبي أنا مشدود
مشدود لجبين نور على نور
عالي فوق ف السما بدر بدور
ولكحل الجفن المبدور
حواليه كده داير مايدور
للضحكة اللي بتروي بحور
وبتنزل ع المهجة سيول
تمحي ف جدبها وسنين بور
تطرح أرضها أحلى زهور
مشدود للسحر وللرقة
للنظرة المحتالة السارقة
للماشية اللي بتشبه ملكة
للحسن اللي ما خلّى وبقّى
لحنان قلبك دقة بدقة
لغرام نجاني من الغرقة
كان قلبي النار كاوياه بحرقة
كان قبلك دنيته مش فارقة
كان زي الطير مضروب طلقة
بس معاكي فاق م العلة
طار ف سماكي علّى وعلّى
يوم ما لقاكي شمس وهله
اتشد ومن أول طلة
وبقاله كيان وياك ووجود
مشدود
بقلمي/ خالد جمال ١/٧/٢٠٢٥
ليست هناك تعليقات:
إرسال تعليق