شهريار
بيقولوا عنه واد شهريار
روميو الديار
أجمل بنات واتقل عيار
مهووسة بيه جالها انهيار
عذِّب وفاء جنن ميار
من غير كلام ومعاكسة
يقوللي ليه؟!
السر إيه؟!
يشرح يا ناس واعمل زَيُّه
ممكن تكون نظرة عنيه
أو رِقَّته ف لمسة إيديه
في شياكته نوع لِبسه وزِيُّه
ممكن يكون بياع كلام
وصنعته مسح النافوخ
ينصب شباكه يرمي السهام
وضحيته أوام تدوخ
كدّاب قوي وحواراته فاكسة
دي حظوظ يا عم
فيه خلق ليها الفرفشة
وخلق ليها الهم
ليها سد نفس ووكسة
مشيت وأنا الاحباط ماليني
زعلان على عمري اللي راح
وضياع سنيني
ده الحب ليه أحوال يا ناس
حيّر عقول عجب العجب
مالهوش نظام ولا ليه اساس
تلقاه على أتفه سبب
يعني الحبيب
مهما عني في يوم يغيب
لو ليّا قِسمة وفيه نصيب
هتشوفه عيني
من غير تعب ومشاكسة
بقلمي/ خالد جمال ١٧/٧/٢٠٢٥
ليست هناك تعليقات:
إرسال تعليق