راح أموت على قلبك وبداري
وشاغلني هواك ليلي نهاري
وأحلف لو شفته بعشقه هبوح
بسكت وف قلبي تزيد ناري
بسهر وبحضّر ف كلامي
وبنام وبشوفه ف أحلامي
كل اللي حفظته ألقاه بيروح
لو عدى وفات من أُدامي
ليه تملي لساني بيتلجم
والخوف على قلبي بيتهجم
إزاي يوصل له حنين الروح
وأنا خجلي ف نفسي بيتحكم
مش عارف أعمل إيه ف حالتي
ليه تملي معاه بنسى قوالتي
لا أنا قادر قلبي ف يوم ينساه
ولا عارف أوصله رسالتي
جوايا شعور مش مفارقني
بيقوللي حبيبي بيعشقني
وعنيه بسمعها تملي تقول
انطق بقى ليه بتزهقني
فكرت أعمله يا ناس حيلة
علشان نخلص من دي الليلة
لو عدى عليا أعمل مشغول
بمكالمة شوق بس طويلة
وقفت أُدامي بتتعجب
ولسان حالها بيقول بكدب
نطقت بكلام حلو ومعسول
وقالت لي أنا زيك بتعذب
أنا حاسة بحبك م الأول
ولا عنك يوم كنت اتحول
مع إنك طبعك يابني خجول
بس أنا حبيتك يا مدهول
كت أجرأ مني وكت أشجع
كت عايشة بعشقي بتتوجع
وقالتلي بحبك كده على طول
وانا كنت بخجلي بروح وارجع
بقلمي/ خالد جمال ٢١/٨/٢٠٢٥
ليست هناك تعليقات:
إرسال تعليق