ماتقوليش
ماتقوليش كان حلم وراح
ماتفوتنيش ف عذاب وجراح
دانا من يوم ما بعدت وقلبي
عمره ما داق طعم الأفراح
ماتقوليش هتلاقي بديل
طير بيقول ف هواك مواويل
عمر الطير ما هيسكن دربي
بعدك كل الطير أبابيل
دانا من بعدك ليلي طويل
دمع عيوني عليك بيسيل
أيوه محال راح يرجع فجري
ولا دمعي هتمحيه مناديل
ليه بإيديك ف النار ترميني
بعد ما عشت سنين ترويني
ليه تتخلى عنيك عن حبي
وتخلي الأحزان تطويني
قلبي هواك من غير ما يفكّر
بعد ما عاش قبلك متسكّر
ولا عشان سلملك أمري
يبقى جزاء الشوق تتنكّر
عمري ما هعشق بعدك تاني
وهعيش كده راضي بحرماني
مهما سنين العمر هتجري
مش هنساك لو حتى ثواني
بقلمي/ خالد جمال ٣/٨/٢٠٢٥
ليست هناك تعليقات:
إرسال تعليق