اطلع بره حياتي وقلبي
خد ف ايديك يا حبيبي الباب
إياك حتى تفوت من دربي
قلبي خلاص عن حبك تاب
وإن جه يوم ولمحتك جمبي
خللي ما بيني وبينك جاب
مانت خلاص مابقتشي لازمني
ماحنا بقينا اتنين أغراب
دانت جنيت بأساك على حبي
بعت الهوى من غير أسباب
مانت كتير كنت بتلعبي
كنت آسرني بشوق كدّاب
ماتهزتشي للهفة قلبي
ولا للعشرة عملت حساب
ياللي خاصمت الكون علشانك
فوت معاك أهل وأصحاب
قلت كفاية عليا حنانك
أتاريه قسوة وويل وعذاب
اطلع بره معادش مكانك
قلبي اللي ف أشواقك داب
مش هيفيد دمعك لو خانك
ولا راح ينفع لوم وعتاب
دانا لو حطيت نفسي مكانك
كنت مشيت قبل انا ماتساب
اتنكرت لقلب وصانك
واستعفيت على شوق غلاب
دانا لو هجازيك على نكرانك
كنت قفلت وراك ميت باب
بقلمي/ خالد جمال ٢٣/١١/٢٠٢٥
ليست هناك تعليقات:
إرسال تعليق