في الرقة وف الدلال
والله عدى وفرق
ف الحسن مالوش مثال
لو فات بيعمل قلق
مانا شفته راح قلبي مال
والعقل مني اتسرق
والله صدق اللي قال
ده غزال بقُصَّه وحلق
ربك خلق الجمال
ده ف يوم ما هوّه اتخلق
خد نصه ويا الدلال
ف السحر عدى وسبق
انساه ده شى محال
واحلف وأقول ع الملأ
عشقه ده فاق الآمال
قلبه ده ليا اتخلق
دانا قبله كان حالي حال
أنَّات جراح ع الورق
مركب وشراعها مال
وخلاص طواها الغرق
ف عنيا الدمع سال
والويل لروحي امتلك
تايه وبسأل سؤال
ليه يا دنيا حلمي اتخنق
هليت قام همي زال
والحزن داب واتحرق
ده صالحني بيه الزمان
شفت معاه البدع
يا جميل وفاق الخيال
يا طبيب وداوى الوجع
بقلمي/خالد جمال ١٨/١٢/٢٠٢٥
ليست هناك تعليقات:
إرسال تعليق