بقلم/ نشأت البسيوني
في لحظه تحس إن كل حاجة حواليك بتتوقف وإن العالم كله مستمر من غير ما يحس بيك تحس إن قلبك بيصرخ بصمت والدموع عيونك مش قادرة توصل لحد حتى نفسك مش قادره تسمع نفسها والكل مشغول بحياته والكل مشغول بمشاكله وانت واقف وسط كل ده بتحاول تفهم ليه الدنيا كده ليه كل اللي بتحبه ممكن يخذلك وليه كل اللي تمنيت يكون معاك بيختفي فجأه بدون سبب واضح بدون تحذير أو تفسير وكل لحظه بتعدي بتحس إن الزمن بيجري منك وانت واقف مكانك وكأنك محبوس في قفص من غير باب
وتفكر في كل الناس اللي اتعلقت بيهم وكل اللي خسرتهم وكل اللي صدقتهم وكل اللي حبيت ومالوش مكان في حياتك دلوقتي وبتسأل نفسك هل كانت كل الضحايا دي عشان تعلمك حاجة ولا عشان تهزمك وتحسسك بالوحدة وبتفتكر كل المرات اللي حاولت فيها تكون قوي وتعمل الصح وكل المرات اللي ضحيت فيها بنفسك عشان تحافظ على علاقات أو على ناس أو على أمور كانت بتهمك والآن بتلاقي إن كل ده راح ومافيش أي فايده وكل وجع جمعته جواك اتكسر فجأه على شكل صمت
وتبدأ تدرك إن كل لحظه ألم وكل دمعة سرقت منك طاقتك كانت دروس خفية كانت بتجهزك للي جاي وإن اللي راح مش دايم وإن اللي موجود دلوقتي ده اللي ليه قيمة وإن قلبك رغم كل الانكسارات رغم كل الغدر رغم كل التجاهل لسه قادر على الحب لسه قادر على العطاء لسه قادر على الثقة في نفسه لسه قادر على الوقوف رغم كل اللي حصل ورغم كل اللي فقده
وتفهم إن القوة مش في ما عندك مش في اللي حصل لك مش في الناس اللي حواليك القوة في إصرارك على النهوض بعد كل سقوط في التمسك بنفسك بعد كل خيانة في الحب اللي أعطيت بلا مقابل وفي القدرة على رؤية الضوء وسط الظلام وفي قبول إن الحياة مش دايمًا عادلة وإن اللي حصل مجرد جزء من طريقك اللي بيرسمه القدر لك وإن كل ألم علمك وكل خسارة وضعتك على الطريق الصح
وفي اللحظات دي بس تسمع صوت جواك صوت صغير لكنه أقوى من أي صخب خارجي بيقولك قوم امشي كمل رغم كل شيء رغم كل خيبة رغم كل صمت رغم كل وجع وده مش ضعف ده دليل إن روحك لسه حيه ولسه فيها أمل ولسه فيها شغف ولسه فيها حاجة مستنيه تكتشفها حاجة مستنيه تعيشها حاجة مستنيه تحس بيها بقلبك كامل ولسه فيه فرصة لكل خير ولسه فيه يوم جديد لكل حلم ولسه فيه بداية لكل طريق جديد
وتقفل عينك وتشوف إن كل اللي فاتك مجرد تهيئة لكل اللي جاي وإن كل ضحاياك وكل وجعك وكل صمتك كان جزء من تدريبك على النهوض مرة تانية أقوى وأهدى وأعمق وأصدق مع نفسك ومع العالم وإنك مهما اتكسرت مهما تعبت مهما وقفت مكانك لسه فيك القدرة على الحب لسه فيك القدرة على الأمل ولسه فيك القدرة على الابتسام ولسه فيك القوة على تخطي كل شيء واللي لسه جاي عمره ما هيكسر إرادتك ولا هيوقفك عن المشي في طريقك
ليست هناك تعليقات:
إرسال تعليق