جوه بحور عشقك لففني
سيبني مع الأمواج تحدفني
بحر هواك والشوق هدَّار
بس محال هيجيبلي دَوَار
ولا تيار يقدر يخطفني
جوه ف نجم عنيك سَكِّني
سيبني أتوه بين رمش ونني
خللي الضي يكونلي نهار
والرمش يبوح بالأسرار
يمحي أنين ف القلب سِكِني
فوق ف سما الاحساس طير بيا
وبهمس الهوى علِّم فيا
علم قلبي يدوب ف هواك
قولي عشقت واقولها وراك
اسقي الروح شهد الحِنِّية
ويا الهوا مع شعرك سيبني
وبأجمل شذى فيه دوبني
وإن جه علينا ف يوم واجتاح
هلقى الهوا لو كان لي رياح
ريح لينة مش ريح بتصيبني
سيب خدك ألمسه بكفوفي
علشان فيا يدوب خوفي
اوعى تخاف على خال ينهار
أو لمستي تقتل أزهار
اللي زرعها الهوى على كيفي
لما بتلمس ايدي ايديك
واقفل حضني وقلبي عليك
أيوه بحس الكون بقى ملكي
كل الناس عن عشقي بتحكي
لما بدوب وتاخدني عنيك
جوه سجل العشق احسبني
اكتب اسمك فيه واكتبني
اكتر قلب ف حبك داب
داب ف حنين وف شوق غلاب
بعد ما كان جرحه معذبني
دوبني
بقلمي/ خالد جمال ١/١/٢٠٢٦
ليست هناك تعليقات:
إرسال تعليق