بقلم/نشأت البسيوني
في المسافة اللي بين ما نريده وما نستحقه بتتكون معظم الحكايات اللي شكلت قلوبنا وغيرت طريقنا وخلت نظرتنا للحياة غير النظرة اللي بدأنا بيها ومع كل يوم بنعيشه بنفهم إن مش كل اللي نفسنا فيه كان هيكون خير لينا وإن مش كل باب اتقفل كان خسارة بالعكس كان ستر وإن مش كل علاقة راحت كانت نقص كانت حماية من وجع أكبر كنا مش هنستحمله وفي المسافة دي
تحديدا بنقابل نفسنا الحقيقية نفسنا اللي بنهرب منها وسط الزحمة وسط الأصوات وسط العلاقات اللي ما بتشبهناش وسط المجاملات اللي بتاكل من روحنا وسط الأماكن اللي بندخلها بالغلط ونحاول نقنع نفسنا إنها كانت اختيارنا لما الحقيقة إن جزء كبير منها كان جبر أو ضعف أو خوف من إننا نكون لوحدنا وفي لحظة صادقة بنكتشف إن الحياة بتكافئ اللي يعرف قيمته مش اللي بيجري ورا
اللي ما يستاهلش واللي يحافظ على اتزانه مش اللي يبيع نفسه عشان يفضل حد جنبه واللي يختار الكرامة قبل العاطفة لأن العاطفة من غير كرامة بتبوظ الروح وتكسرها حتى لو كانت نية القلب طيبة ومخلصة ومع كل خطوة بنبعد فيها عن اللي مش مناسب بنقرب من اللي مكتوب لينا من اللي أصلاً مستنينا من اللي ربنا كان محوشنا ليه وبيعرفنا مع الوقت إن اتأخرنا مش فشل وإن
وحدتنا مش نقص وإن انسحابنا مش ضعف وإن أصعب الدروس هي اللي علمتنا نختار من غير خوف ونحب من غير تنازل ونمشي من غير تردد لما نحس إن احترامنا بقى على المحك وفي المسافة دي بنفهم إن السعيد مش اللي حياته كاملة السعيد هو اللي روحه متصالحة مع نفسها اللي ما بيحاربش عشان يعجب حد اللي مش محتاج يثبت وجوده بكلام ولا يصطنع قوة ولا يلبس قناع ولا
يضحك وهو موجوع السعيد هو اللي بيعرف يقول لأ حتى لو كان التمن ناس هتزعل وناس هتتكلم وناس هتمشي السعيد هو اللي بيحتفظ بكل ما يشبهه ويترك كل ما يثقل صدره ومع الوقت ندرك إن ربنا ما بيأخرش غير اللي لو جه بدري كان هيكسرنا وإن كل دعوة اتأخرت كانت بتتجهز بشكل أجمل وإن كل عوض إحنا لسه ما وصلناش له جاي في وقته المناسب مش قبل ولا بعد وإن كل
حاجة ضاعت كانت بداية لحاجة أصدق وأعمق وأريح وفي آخر الرحلة بنلاقي إن أجمل لحظة هي اللحظة اللي نلاقي فيها نفسنا في نص الطريق بين اللي كنا عايزينه واللي فعلاً نستحقه لحظة نفهم فيها إن اللي راح ما كانش لينا وإن اللي جاي أحسن بكتير من كل اللي فات وإن ربنا دايما بيختار لنا مش اللي نفسنا فيه لكن اللي يناسب روحنا ويليق بقيمتنا ويكبرنا بدل ما يصغرنا وهنا نبتدي
نتنفس براحة ونمشي بثقة ونستقبل الحياة بإيدين مفتوحة وقلب نضيف عارف إنه أخيرا في طريقه الصحيح وإن كل خطوة جاية هتكون أهدى وأنضج وأقرب للي فعلاً نستحقه
ليست هناك تعليقات:
إرسال تعليق