قولي مني عايزة ايه
عايزة قلب شوق وحب
ولا وقت تضيعيه
عايزة حد يحنلك وتحني لِيه
يبقى سلوى ف وحدتك تتأنسي بيه
ضهر ليكي ف شدتك تتحامي فيه
عين بتحرس روح بتهمس
قلب يخلِص
يدي غالي وياخده أرخص
ولا شئ تتسلي بيه
عايزة قلب من الزمن
تتداري فيه
تِلقي فيه أمن وسكن
وتعيشي ليه
حب غالي مالوش تمن
صعب تلاقيه
عشق ليكي كما الوطن
تعتزي بيه
قلب تنسي معاه المحن
يسعدك وتسعديه
ولا قلب تبكِّي فيه
إللى عندي شوق وود
حب غالي مالوهشي حد
قلب شاري يصون بجد
حب يبني ومش يهد
حب عمره ما وطّى حد
يعلى بيكي وتعلي بيه
أما حب يقل قيمة
حب نواياه مش سليمة
نزوة رغبة تفوت ف ليلة
حب غرقان ف الرذيلة
عند غيري هتلاقيه
عايزه ايه
بقلمي/ خالد جمال ٢٩/١/٢٠٢٦
ليست هناك تعليقات:
إرسال تعليق