بقلم/نشأت البسيوني
في لحظة معينة في حياة كل واحد فينا الطريق اللي ماشي فيه بيتغير من غير سابق إنذار طريق كنت فاكره ثابت ومرسوم ومستقر فجأة يتحول لممر واسع مليان ضباب وكأن الدنيا بتسحبك لمكان عمرك ما حسبت حسابه وساعتها تحس ان خطواتك مش مستقرة وان الارض تحتك بتتهز وان كل اللي كنت فاكره مفهوم بقى غامض وكل اللي كنت بتجري وراه بقى بعيد بشكل غريب
وتبدأ تسأل نفسك هل انا اللي اتغيرت ولا الطريق هو اللي بقى غريب هل انا اللي ضعفت ولا الواقع هو اللي شدني برا راحتي وهل لازم اكمل ولا لازم اقف ولا لازم ادور على بداية جديدة اسرح في افكارك وتحس انك واقف بين اختيارات كلها تقيلة وكل واحد ليه ثمن وكل واحد هيغير فيك حاجة لكن الغريب انك رغم تعبك ورغم حيرتك تلاقي جواك قوة خفية بتزقك لقدام قوة عمرك ما فهمت
مصدرها يمكن دعوة من قلب حد بيحبك يمكن أمل ماسك فيك يمكن رحمة ربنا اللي دايما سابقة خوفك وتلاقي نفسك بتكمل رغم انك مش شايف غير متر واحد قدامك وتكمل رغم انك شايل اللي فوق طاقتك وتكمل لأن جواك إحساس بيقول لك ان الطريق حتى لو اتغير مش نهاية الدنيا يمكن يكون بداية اللي كان ناقصك
ومع كل خطوة بتعدي عليك لحظات تشبهك ولحظات ما تشبهكش
لحظات تحس انك ماشي بقلبك ولحظات تحس انك ماشي غصب عنك لحظات تبقى قوي ولحظات تنهار ولحظات تفتكر كل اللي مشيت له سنين ولحظات تتمنى انك ما رجعتش ولا خطوة لكن الأكيد انك بتتغير وده شيء مش دايما مؤلم أحيانا بيكون أعظم هدية من الزمن وتفهم ان الطريق اللي اتغير فجأة ما كانش عقاب ولا خسارة ولا ضياع كان تصحيح كان توجيه كان نقلتك من مكان
كان هيخسرك لأبعد مكان ممكن يرممك كان بيمهد قلبك يشوف اللي كان أعمى عنه ويمكن كان بيطلعك من دائرة لو فضلت فيها كنت هتنطفئ من غير ما تحس وتبدأ الدنيا تبان أوضح الضباب يتقله النور يزيد صوتك الداخلي يرجع اقوى قلبك يرجع يحس نفس احساسه الأول قبل ما يتعب بس بحكمة أكتر ونضج أكتر وتلاقي نفسك مشيت مسافات طويلة من غير ما تاخد بالك
مسافات علمتك ازاي تواجه وازاي تصبر وازاي تفهم قد ايه ربنا بيبدل لك كل حاجة بحكمة انت كنت مش شايفها المشهد تكتشف ان الطريق اللي اتغير ما ضيعكش بالعكس هو عرفك على نفسك خلاك تحس بنعم ما كنتش شايفها خلاك تكبر بصمت وتفهم معنى القوة الهادية اللي ما تظهرش غير بعد عاصفة طويلة وتعرف ان اللي جاية مش زي اللي فات لانك انت نفسك ما بقيتش زي زمان
ليست هناك تعليقات:
إرسال تعليق