بقولِك تعالي يا مالكة الوتين
وبنده عليكي يا كل الهوى
بعِدّ الليالي وبطوي الحنين
وفوق احتمالي حبيبي الجوى
غُلُبت اشكي حالي كسرني الأنين
آسِرني انشغالي قاتلني النوى
بتوه ف الليالي ولا اعرف لفين
خدتني الخطاوي لِمُرّ وكوى
وتاهوا الأطبه ف جرح السنين
وغيرك يا غالي ما ينفع دوا
سألت ف أحبة وناس مغرمين
قالولي إن جرحي دواه الكوى
كوى الجرح قالوا ف سلوى الحنين
ف هجرك حبيبي ونبذ الهوى
محال قلبي يقدر يجافي ليومين
محال عيني تهجر فِ نور أو ضِيا
وروحي اللي هايمة هتحلم بمين
ومين لِيه هتهرب وتلقى الحِمى
وعقلي اللي واخده ودايب سنين
محال ينسى وعده وحلم الصِبا
ما ترجع حبيبي وترحم عينين
من الدمع فضيوا وصابها العمى
ده بعدك لهيبي وقربك يا زين
دوايا وطبيبي وفيض م السما
بقلمي/ خالد جمال ٥/١/٢٠٢٦
ليست هناك تعليقات:
إرسال تعليق