إيّاك تملّ
مدة ايديك لربنا
إن كان في فرح
أو كت جراح شكوى وضنى
ده سميع مجيب منك قريب
غني عن عباده
عن كل واحد مننا
اوعاك في يوم تسأم دُعا
أو يوم تكلّ
كله بأوان لو وقته حان
جاي ف معاده
أملك مجاب لو مهما غاب
أو طال بعاده
والخير عليك تلقاه يهل
بس المهم مهما ابتلاك
وم المحن يابني اعتراك
تصبر وتحسن بالمولى ظنك
لو فيك ألم
أو أي مكروه بيك ألمّ
هيكون حماك
هيشيل كتير في الدنيا عنك
طول ما أنت ماشي دوغري وعِدِل
الجأ اليه في شدتك
بدموع عنيك
انده عليه في كسرتك
ارفع ايديك
سامع نداك وف محنتك
هيحس بيك
ده أقرب إليك من نبضتك
وأحنّ يابني منك عليك
هيزول شقاك والشر بالخير يتبدِل
راميين يارب عليك توكالنا
تصلح لنا في الدنيا حالنا
مايكون لغيرك يوم سؤالنا
تبارك لنا في مالنا وعيالنا
وتزيد في خيرنا ما يوم تقل
إيّاك تمل
بقلمي/ خالد جمال ٢٥/٢/٢٠٢٦
ليست هناك تعليقات:
إرسال تعليق