هفضل كده على طول مستني
قلبي يعيش وياك متهني
عمر ما يأسي هياخدك مني
ولا حتى الوقت هيهزمني
مهما هشوف من ويل أو ومر
مهما العمر معاك هيمر
عمري الجاي معاك مستني
عمر عزيمتي ما تبقى فتور
ولا أشواقي تهاب ميت سور
نبت الهوى راح يبقى زهور
عمر ما أرضه هتصبح بور
مهما هشوف ف هواك وهلاقي
هفضل كده على وعدك باقي
مهما زماني عليا يجور
دانا وياك حسيت بوجودي
جيت بهواك فتَّحت ورودي
بعد الضنا ما كسرلي ف عودي
بعد ما دمعي جرحلي خدودي
مش ممكن هنساك أو اسيبك
ولا يقدر على قلب حبيبك
بعدك عن دنيتي وحدودي
عمر ما قلبي لغيرك مال
قبلك عمري ما شفت جمال
لو وزنولي الدنيا دي مال
شرق وغرب جنوب وشمال
عمري ف يوم للشوق ماتنكر
حضن الهوى هيتنه مسكر
لو عشت ف حبك رحال
يوم ما اوصلك هيفوق ظني
يوم بالفرح معاك متحني
لما القلب عليه هتحني
هلقى الروح وياك بتغني
قلبك يبقى العين والنني
ياللي ملكت ف نبض فؤادي
قلبي تملي عليك بينادي
رد يا روحي عليه وطمني
مستني
بقلمي/ خالد جمال ٢/٤/٢٠٢٦
ليست هناك تعليقات:
إرسال تعليق