عشت العمر معاك وانا راضي
مش مضطر أنا ولا مغصوب
ولا كان فيه اجبار لفؤادي
ولا للعين كنت أنا معصوب
كنت مالكني آسرني ودادي
وأنا على أمري معاك مغلوب
علشان عشقك كان مش عادي
كان لي الشمس شروق وغروب
كنت بتأسى وقلبي يراضي
كنت بقول وعد ومكتوب
كنت بتيجي عليا وادادي
علشان روحي دي فيك بتدوب
وأما بقرب ليك بتعادي
عارف اني انا ماملكشي هروب
بس الريح ف هواك كان عاتي
عصفت بالقلب المسلوب
أيوه أنا المسؤول عن ذاتي
إني وثقت ف شوق العوب
ولا كنت اقدر أنوي بعادي
ولا كنت اعرف عنك أتوب
وأما بدأت تحس آهاتي
صبري معاك كان فاق أيوب
ليه اللي بيضعف يلقى ليلاتي
دمعه على الخدين مسكوب
ويعيش يومه وعمره الآتي
بيكفّر عن عشقه ذنوب
أصلي ضعفت وخدت جزاتي
اصعب جِزا خذلان محبوب
مغلوب
بقلمي/ خالد جمال ٥/٤/٢٠٢٦
ليست هناك تعليقات:
إرسال تعليق