خدت ف ضهري معاك الطلقة
حبك كان لشراعي الغرقة
كان سكينة ف قلبي وراشقة
ليه دانا روحي عاشتلك عاشقة
ليه دانا رمشي هواك من رمقة
يبقى جزائي اتعذب واشقى
والعين تبكي الدمع بحرقة
بس بجد خلاص مش فارقة
هبعد عن أشواقك وانأى
أنأي بروحي معاك م الهلكة
وابعد قلبي عن التنهيد
كنت بخاف ع الود وصاين
كنت فراشلك قلبي جناين
كنت عليك ف العشق براهن
وانت جحود ولعهدك خاين
بس يا ريت كان غدرك باين
مرة بتكدب مرة تداهن
لما وقعت معاك في براثن
وحش وكاسر فيك كان كامن
ولقيت قلبي وروحي رهاين
واما الوقت خلاص بقى حاين
بعت وقلبي عليك كان هاين
واتخليت عن عشق وليد
بس عشان أخلصت في حبي
وانت جنيت على روحي وقلبي
كنت أمين وياك في مشاعري
كنت معاك مغلوب على أمري
عمر ما خنت هواك طول عمري
ربي هداني ونوَّر بصري
واتحررت معاك من قهري
من كسرتي من حنية ضهري
بس مسيرك تندم بعدي
على فرقتي وخيانة وعدي
تبكي عيونك دم ف بُعدي
وتعيش عمرك كله شريد
فجر جديد
بقلمي/ خالد جمال ٣١/٧/٢٠٢٦
ليست هناك تعليقات:
إرسال تعليق