اللي يلوي دراعي يابني
ولَّا حبه يذلني
اللي ياخد قلبي مني
قلبي بس يخصني
اللي فاكر إني هضعف
لو هجرني واعيش ضنى
وعيي عني يغيب واخطرف
لأ ده غيري ومش أنا
ما تخلقشي وما تواجدشي
اللي ريحه يهزني
كنت عايش ليك زماني
كنت هايم بيك أنا
بروي جدبك من حناني
بسقي قلبك م الهنا
كنت طير ملهوف وحاني
غنى ليك عشق ومنى
كنت ترياق ليك يا جاني
وانتشلتك م الضنى
وانت قلبك كان أناني
هد كل اللي اتبنى
كنت مخلص ليك وشاري
كنت بدِّي بجدعنه
بس كان رد انشغالي
سوقت فيها الفرعنة
والتقيتك حد تاني
حد ما عرفتوش أنا
بس ظنك لو ثواني
تلقى يوم ضهري اتحنى
لأ ده ظنك شيء خيالي
ضهري بعدك في السما
روح يا عم وسيبني وامشي
سكتك مش من هنا
مش هتحِيي ف شوق ما دامشي
مش هتِجدي المسكنة
أصله يابني ما تخلقشي
اللي أبكي عليه أنا
بقلمي/ خالد جمال ٢/١١/٢٠٢٦
ليست هناك تعليقات:
إرسال تعليق