تحياتي
محمد ياسين
يا مصرنا يا أمنا
يا ساكنة جوا ف دمنا
قلبك كبير والخير كتير حضنك كبير بيضمنا
يا مصرنا يا أمنا
إنتي الأمان يا طيبة وف وقت حزني قريبة
يام القلوب متغربة
مش حاسة فيكي بالهنا
شايلة الهموم متحملة
شبح العقول المهملة
بس الحقيقة المشكلة
فيه بعض أوضاع محزنة
صوت الحياة ليه اتخنق
بين الدموع حلم اتشنق
وشبابك انتي اللي اتسرق لما اتقتل فيه الغنا
من كام سنة حضنك دفا
وقلوبنا ليه صابها الجفا
جوا العيون حزن انكفى
والحال يدوب على قدنا
يام الحياة والسلسبيل
زاد العطش فينك يا نيل
دانت الطريق وانت الدليل مين اللي بعدك عننا
مصر اللي كرمها الإله
مصر الأمل مصر الحياه
وف حبها أنا قلبي تاه واشتقت لك يا حنينة
الصبر على مرك دوا
يا اللي انتي شيء زي الهوا
صعبان عليكي نكون سوا
دانا بعد منك مش أنا
يا حلم لسه ماعشناهوش
لا حلمنا بيه ولا نعرفوش
فيه مية سؤال فوق الوشوش
مين اللي داس على حلمنا
مين اللي شال همك سنين مين اللي غنالك أنين
غير الغلابة المجروحين غير اللي داق طعم الضنا
حبر الكلام تاه واشتكى
لما الشجر ورقه بكى
كل اللي كان واللي اتحكى
حدوتة هايلة ومتقنة
سايبانا ليه نسأل كتير
مين فينا مات فيه الضمير
بحرك يا غالية مالوش كبير
ماكفاية عند وفرعنة
طوابير بشر خنقة وزحام
والحالة ضنك ومش تمام
آخرتها ليه فلت الزمام وصبحنا غرب ف أرضنا
بلدي بحبك حب موت
مش هارضى فيكي بالسكوت
يطلع نهار ونهار يفوت والحق يفضل حقنا
مهما الدموع طفت شموع
والهم عشش في الضلوع
مش هاتسيبينا ف يوم نجوع
كلك شهامة وجدعنة
ياما لسه فيكي كتير غلابة المطحونين بين الديابة
مشاعرنا مالياها الطيابة
مالناش في شغل الفتونة
ياللي اتعمل فيكي العجب
باكتب حروف اسمك دهب
اتهنتي ليه من غير سبب يام القلوب المؤمنة
الله أكبر يا وطن اشهد وسطر يا زمن
مصر اللي قوتها المحن عايشة ف أمان مطمنة
لازم في يوم ترجع لنا أحلامنا ويهون حملنا
ونعلي صوتنا بالغنا لسه الأغاني ممكنة
لسه الأغاني ممكنة
لسه الأغاني مممكنة
ليست هناك تعليقات:
إرسال تعليق