قصيدة الديوان الثاني " طعم البيوت "
تحياتي محمد ياسين
طعم البيوت
طعم البيوت مابقاش ونس
شكل الوشوش مليان عبس
والليل كبس
والحيرة ساكنة في النفس
والناس تِصَبَّر نفسها
بذل السكوت
ذل الوجع لما في عتمة ليل
يفوت
يا لوعة القلم اللي رفرف
م الوجع
يا دقة القلب اللي ماتت
في الجدع
يا الف مية مليون سلام
على ضحكة
ماشفتش الدلع
طعم البيوت أصبح فراغ
مستني طعم المعجزات
علشان يغير
في المعادلة المذهلة
حتى الحيطان
مفروشة بالفكر
اللي خيم ع العقول
فوق الوشوش حبة نقوش
بتداري في هموم الزمن
واللي اترسم
ملامحنا من غير اي لون
من غير زواق
طعم البيوت اللي اتفرش
بالضحكة فوق خد العيال
ويا الجيران المبسوطين
من هلة الشهر الكريم
وفانوس وزينة اتعلقت
بقلوب صبايا الحتة
قبل ما تتولد
على دقة القلب
اللي رفرف م الخجل
من ضحكة بين بنت وصبي
مع ناس غلابة وطيبين
يستنوا طلة فجر
راجع بالأمل
شايلين على اكتاف الزمن
حمل الرغيف ويا الغموس
طعم البيوت
مرسوم على جبين الزمن
حبة صور
ماعدتش تنفع ذكريات
ولا حتى تنفع تسكن البرواز
وتتزين
باللي كان ياما كان
بنرسم بالأمل حكايات
وبنلون في قلب الليل
ملامح وش بهتانة
بتنفض من جبين بكره
تراب عشش
وساب للذكرى
كام قصة وكام ضحكة
مايستنوش
عشان طعم البيوت
مابقاش ونس
والليل كبس
غطى العيون في الضلمة
وعيال حارتنا السهرانين
ماعادوش يصحوا الحلم
في عنيهم
يستنوا ضحكة شمس تطلع
تنور بالأمل قدام بيتنا الكبير
طعم البيوت
الحيرة ساكنة في النفس
والناس تِصَبَّر نفسها بذل السكوت
طعم البيوت مابقاش ونس
ليست هناك تعليقات:
إرسال تعليق