بتاريخ 30/10/2021
الشاعر المصري
أحمد إبراهيم النجار
يكتب قصيدة (حلم نار )
قُومي أصرخي
ده الفجر
واقف مطرحهُ
والليل طويل
باكي حزين
شقه الدموع
خد القمر
وسيناريو قصه
ف مسرحهُ
قُومي أصرخي
على حلم مات
فوق الجزوع
قبل الأوان
كان مصرعهُ
قُومي أنفُضي
عفن السنين
ده الدرب طين
متوسّخين
توبك وإيدك طرحتك
لما اتكسر
كعب الحذاء
طب قولي مين
هيصلّحهُ
وانتِ حافيه
ف أرض طين
والدمع نازل بالأنين
طب قولي مين
يرسم ملامح
خطوتك
بعد الجراح
وسواد حداد
على طرحتك
آه م سنين
متوسّخين
عقرب ساعات
وبدون رنين
تالف و راح
منه الزمن
واقعه السنين
من غير ثمن
وانتِ ضايعه مدمّعه
والخد دبلان م الأنين
طب قولي مين
هيفرّحهُ
بعد الدموع
كل الآهات
ساكنه الضلوع
والحزن بايت
مطرحهُ
قُومي أصرخي
وأقلعي توب الحداد
ده الجرح زاد
والوهم بايت
ع الجدار
والحلم ناااااار
حارق بواقي شمعتك
بين الشقوق
ثعبان لأيم
باخخ سموم
ماليه السموم جلبيتك
ترياق بعيد
والليل عنيد
والصرخه واضحه
ف خطوتك
كل الكلاب متجمّعين
ناهشه فى توبك القديم
أصبح فتات
واقع وجسدك ينتفض
والرعشه ف
القلب الحزين
أفراح كتير بتودّعهُ
طب قولي مين
وخدك لسكة الضياع
طب قولي مين
هد الحصون
غطىَ الربيع
جاب الجفاف
كاتب عليكِ
سنين عجاف
شريان حياه
قاطع خطوطه
ف بسمتك
قومي أصرخي
ده الحلم ساكن
فيه كبوس
عقرب ساعات
مالهوش تروس
ضحكة نفوس
على دمعتك
محتاجه هدك
من سنين
طاااااال الأنين
متشوّقين بسمة
عيونك للصباح
ده الغدر فاااااااح
لما الظلام
كان مسكنك
والفجر أعلن مصرعهُ
ونهار حزين بيودّعهُ
نزل الستار
غطىَ الشروق
طب قولي مين
هيغيّرهُ
قومي أصرخي
على حلم كان
بين الميدان
بين الميدان
كان مضجعهُ
قومي أصرخي
صرخة أذان
والفجر ناس
راح تسمعهُ
قومي أصرخي
ده الموت حياه
فيها الفتات
والديب بناب
ناهش فى إيدك
من سنين
متجرّحين
حبة سنين متلوّثين
صايبه الحبوب
فيها العفن
حتي الخضَار
أصبح رماد
ملفوف وميّت
فى الكفن
مااااااااات
من سنين
قومي أصرخي
بتدُق أجراس الخطر
بين الفصول
فصلّين بدون
حبة ربيع
والصيف صريع
وخريف طويل
دبلانه فيه ورق الشجر
زاد الخطر مليون خطر
زاد الخطر مليون خطر
قومي أصرخي
صرخة حياه
من بعد موتك الطويل
مشتاق حنين
المح فى يوم
فجرك يعود
ده البرد موت
كاسي الجسد
تبت إيدين الظالمين
تبت إيدين أبو لهب
بقلم الشاعر المصري
أحمد إبراهيم النجار
ليست هناك تعليقات:
إرسال تعليق