( قصيدة بلهجتي المحليّة )
محبوبتي
*********
محبوبتي كلها دلال وجبينها دورة الهلال
قدّيش بحبها قدّيش أجمل من قمر نيسان
قدّيش أنا ..بهواكي ياإم الخصر النحيل
بِعبد ربي و سماكي ياأحلى نجمة بهالليل
الدنيا عتمة لولاكي من دونك صرت ضليل
يا حلوة كيف بنساكي وإنتي بقلبي نجم سهيل
كيف راح إنسى ضحكاكي و شفافك رُق الفنجان
وعيونك السود الوساع كيف راح انسى غمزاتن
يا إم الخد اللمّاع مااحلى المبسم جنباتن
لو زُرت كل البقاع متلك ... ما في بيناتن
الأحلى قدّامك تنباع بزهورن ..و بورداتن
صوتك الناعم مِسماع تصحّي نغماتو الهيمان
تصحّي فاقد الإحساس وتمحي ذنوبو بالأخلاق
كصوت البلبل حسّاس لما سمعها النايم فاق
حكيها كشعر النوّاس بيطفي لوعة المشتاق
تمنيتها عندي نبراس وهيّ تمنتلي الفراق
كان عندي خمس حواس راحوا معها بهالزمان
خُصّة يوم ترد الشعر يكسي جسما والهندام
والبنات يصيبن قهر لإنها البدر التمام
ارشق من غزال ومُهر وأظرف من طلخم النعام
ع حُسنها مابيغلى مَهر حتى لو لبن حمام
ع صوتها بيسكر السَّكر وبتصير جهنم رضوان
وبتصير الدنيا زوال لما يغيب محيّاها
والشمس تغرب بالحال وبيخفى كل غواها
والهرج بين قيل وقال بين الأرض وسماها
لا بجنوب ولا بشمال متلها مافي بحلاها
ويوم انها تزيد الدلال بنسى همومي والأحزان
بنسى الخُلد والجنٍه لما بشوفها بمشيتها
كل خطوِه .. إلها رنِّه كالأنغام بوقعتها
ويوم إنها تقوم تغنّي الله محلّي غنوتها
ياريتها بتسمع فنّي تا فرجيها محبتها
و لو إنها بتبعد عنّي ماببعد عنها محال
وسام الحرفوش
ليست هناك تعليقات:
إرسال تعليق