موال
احوال الدنيا
سامح ايليا
يا دنيا مالك بس ومالى
حرام يا دنيا سيبينى ف حالى
كفايه أسيه يا دنيا كفايه
كفايه منك ما جرالى
أنا طول عمرى عايش وحدانى
وأنت اللى دايما واخدانى
وكل ما ابعد عنك ثانيه
ألاقيكى جيتى من تانى
طب أروح فين أنا يا زمانى
الدنيا تملى ملاحقانى
أضحك وأقول أيام وتروح
ألاقى جراحى مآلمانى
خلصت صبرى معاكى يا دنيا
فضلت صابر لآخر ثانيه
و أنت دايما ظالمانى
وجراحى عندك دى امانى
ولو لقيتينى بضحك مره
تخلى حياتى لون تانى
ليه يا دنيا دانا غلبان
بقالى زمان بأمانه تعبان
بحاول اخرج م اللى انا فيه
موش لاقى معايا ولا أنسان
كل المعارف فاتونى
وكإنى من كتر جنونى
الكل بقى يهرب منى
ولا حتى عاوزين يشوفونى
طب قوليلى راح اعمل ايه
وأيه علاج اللى أنا فيه
رحت لأطبا كتير ياما
ولا حد فيهم علاجى بأيديه
يا دنيا شكوتى منك لله
على مرارى وجرح الآه
هو الواحد وليس سواه
عنده علاجى وأفراحى
سامح ايليا
ليست هناك تعليقات:
إرسال تعليق