لما عم السقا مات
لما عم السقا مات
صوت شارعنا واللي جنبه
كل حاجة فيه سكات
كان زمان اليوم بفرحة
وجوه بيتنا كمان تبات
عدى عُمر . ودنيا سارحة
واللي فاضل . ذكريات
كنا نلعب بالساعات
والحبايب . بالمئات
حلوة جنة الحارات
فيها من الفرح حكايات
والتبات جنب النبات
ياما كلنا كثير مُغات
دُقي هُونك يا زينات
كل بيت بيزور جيرانه
والصحون . خد هات
يلا نعمل طقم شاي
قوموا هاتوا الكوبيات
الولاد قاعدين في ناحية
وناحية تانية للبنات
وأم بولس . خالتي فاطمة
جابوا ترمس والصينية مقرمشات
جنب باب البيت وقاعدة
خاطفة من الدنيا الوداد
ضحكة حلوة لحظة غالية
كلمتين من عمر فات
صوت أبويا لما كان يزعق
يقولي خد يا واد
خدت منه خمسة ساغ
جبت بيها كتييير حاجات
عسلية ومصاصات
كيس كبير غزل البنات
بس صوته راح وفارق
لما قالوا أبويا مات
عد يابني في اللي فات
لما عم السقا مات
سلسلة لما عم السقا مات من ديوان ( زمان )
شادوليات
شاذلي محمد عبدالرحمن حسين
ليست هناك تعليقات:
إرسال تعليق