إيه يعنى عديت الأربعين....
ولا حتى الخمسين......
هو العمر بيتقاس بالسنين.
ولا خلاص بقيت زى الحصان.
أما يعجز يقولوله خلاص .
و يضربوه بالرصاص .
عديت الأربعين ؟ ......
هو انا ميت و دفنتوه.
و استنيتو الأربعين.
ما هو عمر الميت عندنا .
أربعين .....
بعدها نقلع الأسود.
و كل لون حزين .
عديت الأربعين ؟ ......
يعنى خلاص .
أركن على جنب .
و أقزقز لب .
هى دى عيشه؟؟
و الله ده غلب .
والا اروح اقعد على قهوه .
اشرب شاى و العب طاوله .
عديت الأربعين ؟ ......
ان روحت أتقدم لوظيفه .
يقولو عدى السن .
وإن قولت انا خبره و متودك .
يقولو ده اتجن .
طب عمرى إلى فى شغلى فنيته.
وشقايا و ظهري إلى حنيته .
و الزرع إلى بإيدى سقيته.
بقى شجره تضلل و بتطرح.
وانا لسه بدور على مطرح.
عديت الأربعين ؟ ......
خلاص هتطلعونى معاش مبكر .
وانا إلى كنت مفكر .
نفسى لسه شباب .
ولا عشان شعرى شاب.
هو الشباب عندكم .
شورت و فانله وكاب. .
عديت الأربعين ؟ ......
ورغم كل السنين إلى مرت .
أنا لسه قادر و هكمل.
انا لسه جوايا حاجات.
أوقاتى الصعبه خلاص عدت.
و جروح الماضى خلاص لمت.
و شروخ العظم كمان ضمت .
وانا أهو. قدامكم أنا واقف .
مسنود على نفسى و مش خايف.
عديت الأربعين ؟ ......
يا قاضى العمر أحكم بينا .
ما أنتو إلى بدأتو فى تأبينا.
دواره الدنيا و الأيام.
أجيال بتسلم أجيال .
ودوام الحال من المحال.
عديت الأربعين ؟ ......
قطر العمر لسه مافتش.
قطر العمر ما بيفوتش .
لما يعدى عليك فى محطه .
إركب و إشبط فى المضمون .
طول ما انا بجرى جوه الملعب.
فى الوقت الضايع.
انا برده أقدر اجيب جون .
بقلم : هانى فتوح
ليست هناك تعليقات:
إرسال تعليق