بقلمي / عصام حسيني السيد مدين
.................................................
بإيديكوا ضـاع المبتدأ كـان الخبـر مجـهـول
كان فعل ماضي و غِرق خاصم خُطى المفعول
أما المضارع شِــــرق مِ الأمـــــــــر بات مذلول
ظرف الزمـان نسيان أما المكان كان غول
اسم الإشارة كمان أصبح عذاب موصول
جمع المذكر ساعات قاسي عنيد وجَهول
وساعات يخون العهود ويِكَدِب المأمول
وساعات ملاك م السما طيب بقلب بتول
جمع المؤنث يا إما في الرقة يضني عزول
أو باكي شاكي كئيب عايش دموع علطول
يا إما حبة صداع تحتاج لها بَنادول
أو إيد تطبطب بتهدي كل الحنان وتنول
بصيت لوشي في مراية كان مبني للمجهول
و أهو اسم كانَ اتْكَسَر والرَفع بات مشغول
الشَعر شاب والشباب ولَى مــع المَحصول
واسم إنََّ انجرح أما الفَرَح مقتول
كان الصحاب أحباب بالزوفة متعدش
دلوقتي قول العدد واحد وميت دلدول
والحال بيشكي العَدم كُتر الندم بيقول
إن البَدل لو عِدل تصفى الحياة علطول
مُستثنى منها الدموع يصبح وجع مبدول
منقوص يا اسم الشهامة لما الضمير ده يزول
ممنوع وصرفه محال في النعت مش حنقول
امدح وذم بمزاجـك أصل المضاف مشغول
واكمن نُــون النسا حِـلـوة وبنت أصـول
قال المُذكر قصيدة تِشفي عيا المعلول
إعراب لذيذ منتشي بالعِشرة بات موصول
مِن غير خلاف أو خناق تِحلا الحياة علطول
....... ....... ....... .......
بقلمي / عصام حسيني السيد مدين
ليست هناك تعليقات:
إرسال تعليق