وحفاظاً ع الأمن العام
قررت أزرعها ألغام
جوه قلوب كل اللي ماحبّش
وهخلّيه يسهر ما ينام
إزاى عاش العمر في كرب
من غير يعني ما مرة يحب
يعني ماحسش يوم بالذنب
ولا يوم عاش جوه الأحلام
وحفاظاً ع الأمن العام
لازم أخلّي الناس مبسوطة
تصبح أُسطورة وحدّوتة
وكمان هزرع جوة قلوبهم
قُنبلة للحب وموقوتة
أول يعني ما أشد فتيلها
الكل بجد يغنيلّها
وناس م الحب هتسهر ليلها
والدنيا تنوّر قدام
وحفاظاً ع الأمن العام
قررت أزرعها ألغام
تغييراً للوضع السائد
ف أنا بعلن من عندي وأناشد
كل الناس اللي ماحبّوش
حِبّوا وعيشوا الحب بالجامد
ماتخلّوش الحب يضيع
جَو الحب جميل وبديع
أصل الحب أكيد هيبدّل
كل خريف في العمر ربيع
حرب الحب أكيد مشروعة
عمر ما كانت يوم ممنوعة
قلب يحب براس مرفوعة
و دي مسألة مش عايزة كلام
وحفاظاً ع الأمن العام
قررت أزرعها ألغام
جوه قلوب كل اللي ماحبّش
وهخلّيه يسهر ما ينام
بقلمي عبدالحميد وهبه
16/7/2023
ليست هناك تعليقات:
إرسال تعليق