للبلياتشو!!
أنا قُلتْ لِنفسي هَعودْ ضِحكِتْ وقالتلي أمَاني
إن كانْ للحِلم شُهود تِبقَى انت أكيد مِش فَاني
حتما أنا لازم أعود بين شجر اللوز والتوت
الحلم جمالُه خيالُه مفهوش أسوار وحدود!!
وصراع بين حلم وواقع بين سمكة قرش وحوت
الحلم محار وقواقع والواقع موج وسدود
جغرافيا تاريخ ومواقع ومعارك بالنبوت
لو كان للحلم مراجع يبقى الواقع هلفوت!!
الواقع أصلُه ثواني مليان أوجاع وأناني
ودقيقة تُجرْ دقيقة ونقول واقع إنساني
لخيالي معاني رقيقة بتروح على كوكب تاني
أفكاره لسه بريئة مفهاش مجرم أو جاني!!
ومشاعري حرة جريئة بتقول للفرصة تعالي
والكلمة معايا صديقة بتقولي تعالى يا غالي
حُرية جِناحها الروح وجناحها التاني حناني
مفهاش أحزان وجروح تِرسم حِلمي بألواني!!
بحلم والحلم أمان والواقع كله مآسي
أزمان وعصور ومكان والحلم نور ومراسي
لا جاه لا سلطان لا مناصب لا كراسي
مش عايز أعود إنسان وحِلمي هو خلاصي!!
ومعايا ورقي وقلمي والفكرة جمالها براسي
أستيكتي تمسح ألمي وغلافي يكون إحساسي
الدنيا إيه غير فكرة والرب نور على نور
أحلامنا ترسم بكرة والواقع غش و زور!!
الواقع هو النكرة والحلم خيال مسحور
وف يوم راح نصبح ذكرى ونعود ولدان مع حور
أنا كنت إمبارح غيب واليوم موجود ف الدنيا
والواقع أمره عجيب. سايب تامر مع سونيا!!
بارات وحانات ومراقص ومفيش حد يقول عيب
وكإن العالم ناقص نرجع بين شك وريب
الواقع إن أنا واقع بين حلمي وبين الواقع
وهاسيبك ساجد راكع واسأل فين بس العيب!؟
الحلم منام في مضاجع والواقع نار ولهيب
والكل هيرجع خاضع ويحاسب ع المشاريب!!
شعر
عامي
للبلياتشو
وليد حسانين
٤/١٢/٢٠٢٣
القاهرة /مصر
ليست هناك تعليقات:
إرسال تعليق