بلدي اللي عِشنا فيها م العمر سِنين
بمزاجنا يعني ولّا كُنّا مغصوبين
ماعرَفش يعني القسوة لينا دي عذاب
ولا بقى قسوتها دي حب وحنين
ماعرَفش من كُتر اللي شُفناه منّها
نِكرّهَا يعني ولا عادي نحبّها
زي تمام أم دَعت على إبنها
أنا بَدعي لٓكن أكره اللي يقول أمين
بلدي اللي عِشنا فيها م العمر سنين
عِشنا سنين فيها أكيد نِكبر ونتعلّم
وحاولنا يعني بالعلام إن إحنا نتقدّم
طِلع العلام فعلاً مالوش لازمة
وإن إحنا يعني بوضعنا لابد نتأقلِم
وإن يوم حاولنا إننا عن نفسِنا نعبّر
ونقول كلام نفسنا نقوله مش أكتر
وأهو كلام فعلاً لا هيقدم ولا يأخر
طِلع السُكات في الحالات دي هوَّ أكيد أسلَم
لمّا بشوف الفرق فعلاً في المُعاملة
بيني وبين الأجنبي ولّا الغريب
مع إن مفروض إبنَها هو اللي أولَى
وقت أمّا تصرخ إبنَها بيكون قريب
تلاقيني بزعل بس بردوا بخاف عليها
وبحاول أهرب بس بَرجع تاني ليها
نفسي تحاول مرة تحضني بإيديها
وأحس إني في حُضنَها أقرب حبيب
بقلم عبدالحميد وهبه
ليست هناك تعليقات:
إرسال تعليق