الحاج عرفة
للكاتب المصري م محمود عبد الفضيل
-هو يا جدي ليه الناس مسمياك الحاج عرفة مع أن أسمك الحقيقي محرم
_هيييه دي حكاية طويلة خايف احكيهلك تنام مني
_لسة بدري أحنا فين و ميعاد النوم فين
_شوف ياسيدي ولا سيدك إلا أنا . وأنا صغير كنت شقي جدا لاني كنت وحيد علي بنات و أبويا كان مدلعني قوي
مفيش حاجه وحشة إلا و عملتها
_تمام تاريخ مشرف
_ حتي بعد ما اتجوزت و خلفت أبوك فكرت في تأمين مستقبله فحرمت أخواتي البنات من الميراث
و اشتغلت بالربا لحد ما ثروتي بقت زي ما أنت شايف
_فعلا ثروة تكفي أجيال
_ المهم حصل لي تعب جامد جدا و مرضت مرض خطير
ساعتها حسيت أن وقتي قرب و هموت بالمرض ده و فكرت أكفر عن ذنوبي كلها مرة واحدة
_عملت أية ؟
_قلت احج .
_فكرة حلوه
_دفعت مبلغ عشان أطلع خدمه حجاج و بالفعل سافرت مع وفد من البلد كخدمة حجاج تبع ناس شغالة في الموضوع دة
_يعني طلعت ببلاش
_عيب عليك دة انا كنت بأخد فلوس كمان
المهم جت ليله عرفه و حسيت بمغص شديد و ألم في المعدة و اسهال و رحت المستشفي هناك واتحجزت أربعة أيام مابين فحص و أشعة و تحاليل و خلافة
_وطبعا كدة ما وقفتش في عرفة
_كل سنه وانت طيب اللي خفف الصدمة عندي إني مادفعتش تكلفة الحج
_وطبعا اللي في البلد عرفوا الموضوع و سموك الحج عرفه
_عالم ما بتستر
_طب الموضوع دة مخلكش تراجع نفسك وترجع حق أخواتك البنات في الميراث و تبطل ربا
_ يابني دي عادات و تقاليد مفيش حد بيورث بنات هنا
الأرض الرجاله فقط
_طب عمدتنا حج السنه اللي فاتت رغم أنه حرم كل اخواته بنين و بنات من الميراث و وقف علي عرفه
_صح بس اللي محدش يعرفه أنه ما شفش الكعبه
ليست هناك تعليقات:
إرسال تعليق