علشان شايفها صابرة أو متحمّلة
فكّرت راح تفضل معانا مكمّلة
معرفش إن وجعها زاد عن صبرها
وإن التعب أصبح في آخر مرحلة
بتكون معانا البسمة مالية وشّها
بتخبّي بيها أكيد ألامها ودمعها
رغم الآلام الساكنة جوة منّها
هي اللي حاسة وعارفة حجم المشكلة
علشان شايفها صابرة أو متحمّلة
أه لو بإيدي كنت أتعب يوم بدالِك
أو حتى أعاني م اللي دايماً بتعانيه
مين بس يعرف في الوجع إزاي نضالك
ولّا الألم اللي أنتِ كنتي بتشوفيه
رغم الوجع عايشة وملازمك الرضا
راضية أكيد باللي إنكتب واللي إنقضى
عِشتي سنين بتداري وجعك عنّنا
معقول يكون لسه فيه ناس بالشكل ده
خايف قوي لتقولي يوم كلمة وداع
كلمة تاخدنا معاها لبحور الضياع
بعد أمّا كنّا ليل نهار مع بعضّنا
هيكون ده بينّا يعني آخر إجتماع
لو كان لقانا هيبقى ده آخر لُقى
أرواحنا فيكي وبيكي كات متعلّقة
أكبر مثال في الصبر وسنين الشقى
شجرة وعلينا تملّي كنتي مضللة
علشان شايفها صابرة أو متحمّلة
بقلمي عبدالحميد وهبه
ليست هناك تعليقات:
إرسال تعليق