اخيرا اكتشفت
إن باب قلبي
بيفتح من جوه
مش من بره
وان مفتاحة من جوه
وان حبيبتي ومن سنين
قاعدة فيه ومستخبية
عرفت. انا ليه
ما عرفتش احب تاني
غير حبيبتي الأولانية
وبعد سنين طويلة
دقيت علي باب قلبي
فتحتلي حتة صغيرة
لقيتها هي هي
مش متغيرة
نفس العيون نفس الشفايف
حتي تسريحة شعرها
كأنها لسه بنت صغيرة
بعد السنين دي كلها
ماعداش الزمن علي سنها
رميت نفسي في حضنها
مش هوا دا كان حضنها
لا فيكي حاجة متغيرة
وانا لسه بردوا بتاع زمان
احمد حبيبك
وايه غيرك ياتري
كلمة شمال وكلمة يمين
وحاسبتني علي السنين
وان الجفا ويا الحنين
غيروني حتة صغيرة
لكن لسه بحبك
قومت انا صدقت
لأن في وسط الكلام
قالت كلمة صغيرة
برغم انها متغيرة
لكن صدقت
لأني لسه بحبها
بقلم
احمد محمود
من ديوان سكة العاشقين
ليست هناك تعليقات:
إرسال تعليق