ابن الجنية سرق مني
أجمل لياليا
عشمني بحبه وكان واخد
قلبي أنا تسلية
فات ليا القسوة وخد مني
كل الحنية
بعد اما هويته ساب الغية
وهجر البِنّيّة
ابن الجنية
ابن اللعيبه يادي العيبة
كييف مرازية
فصَّلِّي رزية على مقاسي
تفصيل ترزية
كت صورته ملاك جوه ف عيني
مش وش أذية
ماخطرشي ف بالي يشقّيني
أو يلعب بيا
ابن الجنية
كان عشقه لقلبي وكان شوقه
فخ يا ناس ليا
على نبله شهامته و على ذوقه
ليه مني تحية
ده ف غدره وزيفه وف خيانته
ياخد المثالية
وف جرح الروح لأ من حقه
شهادات فخرية
ابن الجنية
ده مسيره في يوم
يلقى الجن
اللي يخلص ليا
يلقى الحرمان
وآهات هم
وجراح وأسية
ويقوله كفايه
ولا يحن
ويتوه بعديا
واسمع كده صوته
أما يأن
يشجي الروح فيا
ابن الجنية
بقلمي/ خالد جمال ١٥/٧/٢٠٢٥
ليست هناك تعليقات:
إرسال تعليق