قوللي مين أسَّاك عليا
قوللي ذنبي إيه معاك
قوللي إيه هيه الخطية
ذنب قلبي عشان هواك ؟!
ولا ذنب دموع عنيا
اللي سالت من أساك
أو تكون يابني القضية
إني سبت الروح معاك
لأ خلاص معروفة هيه
إني كنت ف يوم حماك
إني مديتلك ايديا
وانتشلتك م الهلاك
لما بديتك عليا
قلت يابني عليك ملاك
لما كنت مصفي نية
وانت غدر الكون ملاك
لما عشت معاك ضحية
كنت مستحمل أذاك
دانت عندك حق يابني
تأسى وتزوِّد جفاك
كل دي أفعال تعيبني
أيوه كنت خسيس معاك
لأ وبسأل ليه تاعبني
جاي ومتعشم رضاك
روح يا سيدي روح وسيبني
بعتذر لك عن أساك
بكره حقك تاخده مني
ع اللي أذنبته ف هواك
بقلم/ خالد جمال ١٩/١١/٢٠٢٥
ليست هناك تعليقات:
إرسال تعليق