ياللي انت أسير خدك خالك
وخاطفني برنة خلخالك
ماتقوللي طريقك يابني منين
دلني على أبوك أو بيت خالك
ياللي أنت عنيك بحر وهادر
والسحر ف رمشك شئ نادر
يا حبيبي أنا تهت مع التايهين
والقلب خلاص مابقاش قادر
ياللي انت القد ده فيك ظالم
ولا فاد فيه شكوى ولا مظالم
وان لمته بيعمل فيها مسكين
وكأنه برئ أوي ومسالم
ياللي أنت ضفايرك سرقاني
من نفسي ومن كل كياني
بضفيرة حرير وضفيرة موهير
دايماً ملكاني وسحراني
ياللي انت شفايفك نار حمرة
تحدف ف لهيبها كما الجمرة
والشهد ده منها تملي يسيل
وبتسكر كما كاس م الخمرة
يا حبيبي أنا قلبي إليك سلم
والروح م العشق هتتكلم
بتعدي العين بتشع حنين
وان غبت بتطفي وبتضلم
بقلمي/ خالد جمال ١٥/١١/٢٠٢٥
ليست هناك تعليقات:
إرسال تعليق