بقلم/نشأت البسيوني
في زحمة الحياة الانسان فاكر انه عايش بالاحداث الكبيرة بالقرارات المصيرية بالنجاحات الواضحة وبالانكسارات اللي تهز القلب لكن الحقيقة ان الانسان عايش بحاجات اصغر بكتير حاجات ما حدش بياخد باله منها لكنها لو اختفت الدنيا كلها تقع عايش بنفس طالع في نص تعب من غير ما يحس بيه عايش بنظرة عدت من حد طمنت قلبه من غير ما يتكلم عايش بعادة صغيرة اتكررت لحد ما
بقت امان عايش بحاجة بسيطة زي انك تعرف ان في مكان تقدر ترجعله من غير ما تشرح نفسك الاشياء دي ما بتتكتبش في سيرة ذاتية وما تتحطش في صور وما تتحسبش انجاز لكنها هي اللي ماسكة الانسان من جوه هي اللي مخلياه مكمل حتى وهو مش فاهم ليه لسه مكمل فيه ناس عايشة على كلمة اتقالت لها في وقت صح وفيه ناس عايشة على وعد ما اتنفذش لكنه اداها امل وفيه
ناس عايشة على ذكرى عابرة حصلت مرة واحدة لكنها فضلت تسندهم سنين والاغرب ان الانسان ما يعرفش قيمة الحاجات دي غير لما تتهدد او تختفي ساعتها بس يفهم ان اللي كان فاكره عادي كان في الحقيقة سبب بقاءه وان اللي كان بيعدي عليه مرور الكرام كان هو الروح اللي بتشيله من غير ما يقع الانسان ما بيقعش فجأة هو بيقع لما الحاجات الصغيرة دي تتكسر واحدة واحدة لما
الاطمئنان يقل لما المساحة الامنة تضيق لما يبقى مطالب يشرح نفسه طول الوقت لما يبقى وجوده محتاج تبرير وعشان كده اكتر انسان قوي هو الانسان اللي محافظ على حاجاته الصغيرة اللي مش باينة اللي محدش شايفها غيره انسان فاهم ان الحياة مش بطولة مستمرة ولا صمود دايم الحياة احيانا بس انك تلاقي حاجة بسيطة تمسك فيها وانت ماشي وفي لحظة صفا نادرة الانسان يفهم انه
مش محتاج يغير الدنيا كلها ولا يحقق كل احلامه ولا يثبت انه مختلف هو محتاج بس ما يفرطش في الحاجات اللي عايش بيها حتى لو كانت بسيطة حتى لو كانت غير مفهومة للناس وفي الاخر تعرف ان الانسان مش بيتقاس بحجم صوته ولا بعدد اللي عرفوه ولا بكم اللي حققه الانسان بيتقاس بالحاجات اللي كانت كفاية تخليه يعيش يوم ورا يوم من غير ما ينهار وبالاشياء الصغيرة اللي خلت قلبه يفضل واقف رغم كل حاجة
ليست هناك تعليقات:
إرسال تعليق