بقلم/نشأت البسيوني
حين يعجز القلب عن الهروب يلاقي نفسه محاصر بين صوته اللي بيصرخ جواه وبين وشوش الناس اللي بتفتكر انك بخير وانت ولا بخير ولا حتى قادر توصف حجم الانهيار اللي مستخبي تحت ضلوعك اللي بينكسر كل يوم من غير ما حد يسمع صوت الكسر ده وتحاول تمشي في الدنيا كأنك ثابت وهي أصلا بتتزحلق من تحت رجليك وكل خطوة بتاخد منك روح وروحين لحد ما تبقى ماشي
ولكنك مش موجود وتتظاهر انك قادر ولكن الحقيقة انك على وشك الانطفاء بس مستحي تعترف لأن الاعتراف حيكسرك قدام نفسك قبل الناس وتفضل تسأل هو انا ليه لسه واقف هو انا ليه لسه بحاول يمكن عشان اتعودت احارب حتى لما الحرب مش حربتي ولا الهدف هدفي ولا الطريق طريقي تفتكر انك تعودت على الوجع بس الحقيقة ان الوجع ما بيتعودش عليه الوجع بيتراكم زي غيم اسود
فوق صدرك ولما ينزل بينزل دفعة واحدة يمطر حزن يكفي مدينة كاملة وتدور تدور وتدور على سبب واحد تخليك تكمل وما تلاقيش غير قلبك اللي بقى هزيل زي ورقة شجر في آخر الخريف ورغم كده لسه ماسك في الحياة كأنه خايف يسيبها ولو سابها يضيع أكتر وتعرف جواك ان المشكلة مش في الناس اللي وجعتك المشكلة فيك انت اللي فضلت صابر وساكت وقدمت مساحات من روحك
لأشخاص ما قدروش حتى يحافظوا عليها يمكن لأنك طيب زيادة يمكن لأنك ما كنتش قادر تقول لا يمكن لأنك كنت فاكر ان الصبر حيغيرهم وفي النهاية اكتشفت ان الصبر ما بيغيرش حد هو بس بيستنزفك لغاية ما تفرغ بالكامل وتلاقي نفسك واقف قدام الجدار الأخير في حياتك الجدار اللي يا يكسر يا تتكسر وساعتها تشوف الحقيقة اللي كنت دايمًا مغمّي عينك عنها انك ما كنتش محتاج
الناس اللي خذلوك انت كنت محتاج نفسك اللي ضيعتها في نص الطريق وتبتدي تلم روحك من تاني من فوق الأرض وكأنك بتجمع زجاج مكسور بإيديك وتتجرح وانت بتحاول ترجع كل قطعة لمكانها واللي يرجع يرجع واللي يضيع يضيع المهم انك ما تقفش المهم انك تفضل تحاول حتى وانت موجوع حتى وانت لوحدك حتى وانت مش فاهم هتوصل لفين لأن أعظم النجاة بتيجي بعد
أقسى اللحظات وأقسى الانهيارات وأكبر الدروس بتتولد من قلب الأوجاع اللي ما حدش شافها ولا حد قدرها ولا حد حس بيها غير ربك اللي كان شايفك وانت بتتفتت بس برضه واقف ومكمل كأنك رافض تسلم مهما الدنيا حاولت توقعك ويمكن كل اللي جاى يكون أحن وأخف وأدفى ويمكن اللي اتاخد منك كان لازم يتاخد علشان تتولد من جديد بشكل أصدق وأقوى وأوضح لنفسك قبل الناس
ليست هناك تعليقات:
إرسال تعليق